ايه هي أهم القيود المحاسبية اللي أي محاسب لازم يكون حافظها ؟
لو إنت لسه في بداية مشوارك في المحاسبة، أو حتى شغال بس عايز تراجع الأساسيات، فأهم حاجة لازم تكون حافظها وبتستخدمها بإيدك هي القيود المحاسبية.
القيود دي هي اللغة اللي بنسجل بيها كل حاجة بتحصل جوه الشركة – من أول رأس المال، لحد البيع والشراء، والمصروفات والمرتبات
قيد رأس المال
يعني إيه؟لما صاحب الشركة يحط فلوس علشان يبدأ المشروع.
القيد بيكون كده:
من حـ/ البنك أو الصندوق
إلى حـ/ رأس المال
مثال:
صاحب الشركة حط 100,000 جنيه في البنك علشان يبدأ الشغل
من حـ/ البنك 100,000
إلى حـ/ رأس المال 100,000
قيد شراء أصل ثابت (زي أثاث أو معدات)
يعني إيه؟الشركة اشترت حاجة كبيرة هتستخدمها في الشغل لفترة طويلة.
القيد بيكون:
من حـ/ الأصل (زي: أثاث - معدات)
إلى حـ/ البنك أو الصندوق
مثال:
اشترينا أثاث بـ 10,000 جنيه كاش.
من حـ/ الأثاث 10,000
إلى حـ/ الصندوق 10,000
قيد الإهلاك
يعني إيه؟الأصل اللي اشتريناه بيقلّ قيمته مع الوقت، فلازم نسجل ده
القيد بيكون:
من حـ/ مصروف الإهلاك
إلى حـ/ مجمع الإهلاك
مثال:
إهلاك الأثاث في السنة = 1,000 جنيه.
من حـ/ مصروف إهلاك أثاث 1,000
إلى حـ/ مجمع إهلاك أثاث 1,000
قيد شراء بضاعة (على الحساب)
يعني إيه؟اشترينا بضاعة ومش دفعنا فلوس دلوقتي، هنحاسب بعدين.
القيد:
من حـ/ المخزون
إلى حـ/ الموردين
مثال:
اشترينا بضاعة بـ 15,000 جنيه ولسه مدفعتناش.
من حـ/ المخزون 15,000
إلى حـ/ الموردين 15,000
قيد البيع الكاش
يعني إيه؟بعنا بضاعة وقبضنا فلوسها فورًا.
القيد:
من حـ/ الصندوق أو البنك
إلى حـ/ المبيعات
مثال:
بعنا بضاعة بـ 5,000 جنيه كاش.
من حـ/ الصندوق 5,000
إلى حـ/ المبيعات 5,000
قيد البيع الآجل
يعني إيه؟بعنا بضاعة لعميل وهيحاسبنا بعدين.
القيد:
من حـ/ العملاء
إلى حـ/ المبيعات
مثال:
بعنا بضاعة بـ 8,000 جنيه لعميل، ولسه مدفعش
من حـ/ العملاء 8,000
إلى حـ/ المبيعات 8,000
قيد المصاريف
يعني إيه؟دفعنا مصاريف زي الإيجار أو الكهربا أو الإنترنت
القيد:
من حـ/ المصروف (زي الإيجار)
إلى حـ/ البنك أو الصندوق
مثال:
دفعنا إيجار بـ 3,000 جنيه.
من حـ/ مصروف الإيجار 3,000
إلى حـ/ البنك 3,000
قيد الرواتب
يعني إيه؟مرتبات الناس اللي شغالة معانا
القيد:
لو لسه مدفعتش المرتبات:
من حـ/ مصروف الرواتب
إلى حـ/ مستحقات العاملين
لو دفعتها:
من حـ/ مصروف الرواتب
إلى حـ/ البنك أو الصندوق
مثال:
مرتبات بقيمة 20,000 ولسه مدفعتش.
من حـ/ مصروف الرواتب 20,000
إلى حـ/ مستحقات العاملين 20,000
قيد قبض دفعة من عميل
يعني إيه؟العميل اللي اشترى مننا على الحساب بدأ يدفع جزء من اللي عليه.
القيد:
من حـ/ البنك أو الصندوق
إلى حـ/ العملاء
مثال:
العميل دفع 3,000 جنيه.
من حـ/ البنك 3,000
إلى حـ/ العملاء 3,000
قيد سداد دفعة لمورد
يعني إيه؟بدأنا نسدد فلوس للمورد اللي اشترينا منه بضاعة قبل كده
القيد:
من حـ/ الموردين
إلى حـ/ البنك أو الصندوق
مثال:
سددنا 7,000 جنيه لمورد.
من حـ/ الموردين 7,000
إلى حـ/ البنك 7,000
يمكنك التعليق هنا